Opinn vinnufundur í Bergi vegna umsagnar til Skipulagsstofnunar um mögulega starfsemi Íslandsþara á Dalvík.

Miðvikudaginn 6. apríl kl. 13-14 verður opinn vinnufundur í Bergi en fyrir Dalvíkurbyggð liggur að veita umsögn um mögulega starfsemi Íslandsþara ehf. á Dalvík. Þeir íbúar sem hafa áhuga á að fylgjast með málefninu geta mætt á vinnufundinn og fengið nánari upplýsingar hjá starfsmönnum Dalvíkurbyggðar sem vinna að málinu.

Úr fundargerð byggðaráðs 31.mars sl:

Á 1021. fundi byggðaráðs þann 17. mars sl. var eftirfarandi bókað:

"Á 370. fundi umhverfisráðs þann 17. mars tekin fyrir umsagnarbeiðni frá Skipulagsstofnun og eftirfarandi bókað: "Tekið fyrir erindi frá Skipulagsstofnun til Dalvíkurbyggðar, dagsett 7. mars 2022 en Íslandsþari ehf. hefur sent Skipulagsstofnun tilkynningu um framleiðslu algínata og þaramjöls úr stórþara skv. 19. gr. laga um umhverfismat framkvæmda og áætlana nr. 111/2021. Rétt er að vekja athygli á því að endanleg staðsetning starfseminnar hefur ekki verið ákveðin en í meðfylgjandi greinargerð eru þrjár staðsetningar til skoðunar í tveimur kaupstöðum, þ.e. á Dalvík og Húsavík. Í samræmi við 20. gr. laga nr. 111/2021 er óskað eftir umsögn um framkvæmdina. Í umsögninni skal koma fram eftir því sem við á, hvort talið sé að nægjanlega sé gerð grein fyrir framkvæmdinni, umhverfi hennar, umhverfisáhrifum, mótvægisaðgerðum og vöktun eftir því sem við á. Jafnframt hvort og þá hvaða atriði talið er þurfa að skýra frekar og hvort þau kalli að mati umsagnaraðila á að framkvæmdin fari í umhverfismat að teknu tilliti til viðmiða í 2. viðauka laga um umhverfismat framkvæmda og áætlana. Jafnframt skal í umsögn gera grein fyrir leyfum sem framkvæmdin er háð og eru á starfssviði umsagnaraðila. Umsögnin óskast send Skipulagsstofnun fyrir 5. apríl 2022. Með umsagnarbeiðninni og fundarboðinu fylgdi skýrsla Íslandsþara um verkefnið, unnið af Mannvit hf. Sveitarstjóri kynnti forsögu verkefnisins og aðkomu Dalvíkurbyggðar að því. Umhverfisráð felur starfsmönnum Framkvæmdasviðs að vinna drög að umsögn um verkefnið fyrir næsta fund ráðsins. Samþykkt samhljóða með fimm atkvæðum. Lagt fram til kynningar."

Gert var ráð fyrir að fundur umhverfisráðs yrði á morgun 1. apríl og að drög að umsögn færi fyrir ráðið fyrir tilskilinn tíma. Fundur umhverfisráð verður í næstu viku og því eru drög að ofangreindri umsögn meðfylgjandi fundarboði byggðaráðs.

Byggðaráð gerir ekki athugasemdir við drögin eins og þau liggja fyrir en ráðið leggur áherslu á að umhverfisráð fjalli um umsögnina áður en hún fer til Skipulagsstofnunar.