Sorpflokkun í Dalvíkurbyggð

Á heimasíðu Dalvíkurbyggðar er að finna upplýsingar um sorpflokkun í sveitarfélaginu undir hlekknum Endurvinnslustöð sem er á forsíðu heimasíðunnar.

Þar má finna ýmsar gagnlegar upplýsingar svo sem:

• Sorphirðudagatal
• Leiðbeiningar um lífræna söfnun
• Leiðbeiningar um flokkun og sorphirðu

Einnig er þar að finna upplýsingar um staðsetningu og opnunartíma Endurvinnslustöðvar Dalvíkurbyggðar en hún er staðsett við Sandskeið og er opin mánudaga, miðvikudaga og föstudaga frá kl. 15:00-18:00 og á laugardögum frá kl. 11:00-14:00. Starfsmaður er á svæðinu sem aðstoðar við sorpflokkun og sorplosun.

Hvert heimili í sveitarfélaginu á að hafa tvær sorptunnur, eina svarta tunnu fyrir almennt og lífrænt sorp og eina græna tunnu fyrir endurvinnanlegt sorp. Svarta tunnan er losuð tvisvar í mánuði og græna tunnan einu sinni í mánuði samkvæmt sorphirðudagatali.

Þess má einnig geta að móttaka skilagjaldsskildra drykkjarumbúða (dósamóttaka) er hjá Landflutningum Samskip, Ránarbraut 2b, á miðvikudögum milli kl. 14:00 og 17:00.

Fyrirhugað er að halda íbúafund þar sem þessi mál verða kynnt enn frekar auk þess sem þar verður farið yfir fyrirhugaðar breytingar á fyrirkomulagi sorphirðu og verður hann vel auglýstur þegar að honum kemur.