Byggðaráð

Undir þessum lið komu á fund byggðaráðs frá Einingu-Iðju, Anna Júlíusdóttir, formaður Einingar-Iðju, og Tryggvi Jóhannsson, varaformaður Einingar-Iðju, kl. 13:15.

Með fundarboði byggðaráðs var erindi frá Einingu-Iðju, dagsett þann 17. febrúar sl., þar sem óskað eftir fundi með Dalvíkurbyggð til að ræða stöðuna á ræstingar markaði. Í ljósi umfjöllunar í fjölmiðlum þá óska forsvarsmenn félagsins eftir fundi til að koma sjónarmiðum sínum á framfæri við fyrsta tækifæri.

Anna og Tryggvi viku af fundi kl. 14:03.

Undir þessum lið komu á fund byggðaráðs Gísli Bjarnason, sviðsstjóri fræðslu- og menningarsviðs, og Friðrik Arnarsson, skólastjóri Árskógarskóla - og Dalvíkurskóla, kl. 14:04.

Á 302. fundi fræðsluráðs þann 12. febrúar sl. var eftirfarandi bókað:
"Gísli Bjarnason, sviðsstjóri fræðslu - og menningarsviðs, fer yfir niðurstöður á foreldrakönnun í Árskógarskóla er varðar framtíðarskipulag skólamála á Árskógarströnd.
Niðurstaða : Fræðsluráð felur sviðsstjóra og skólastjóra Árskógar - og Dalvíkurskóla að fara með kynningu á niðurstöðum á könnun hjá foreldrum Árskógarskóla á framtíðarskipulagi skólamála á Árskógarströnd á fund hjá byggðaráði."

Sviðsstjóri fræðslu- og menningarsviðs og skólastjóri fóru yfir ofangreinda kynningu og niðurstöður.

Gísli og Friðrik viku af fundi kl. 14:44.

Sviðsstjóri fjármála- og stjórnsýslusviðs kynnti eftirfarandi skýrslur:
Staða bókhalds janúar - desember 2024 í samanburði við heimildir á áætlun - rekstur.
Þverkeyrsla á fjárhagslykla janúar - desember 2024 sem sýnir hvaðan tekjur koma og hvert þær fara helst í rekstrinum.
Samanburður á launakostnaði janúar - desember 2024 og stöðugildum 2024 í samanburði við heimildir.

Samantekt á fjárfestingum 2024 vs. heimildir verður tekin fyrir síðar.

Sviðsstjóri fjármála- og stjórnsýslusviðs kynnti eftirfarandi skýrslur:
Samanburður bókhalds fyrir janúar 2025 við heimildir fyrir janúar 2025 og allt árið 2025.
Samanburður á launakostnaði janúar 2025 við heimild í áætlun fyrir sama tímabil.

Tekin fyrir fréttatilkynning frá Innviðaráðuneytinu þar sem fram kemur að drög að frumvarpi til laga um Jöfnunarsjóð sveitarfélaga hafa verið birt í samráðsgátt stjórnvalda. Frestur til að skila inn umsögn hefur verið framlengdur og er til og með 5. mars nk.
https://island.is/samradsgatt/mal/3917

Tekið fyrir erindi frá Innviðaráðuneytinu, dagsett þann 19. febrúar 2025, þar sem ráðuneytið vekur athygli á því að opið samráð stendur nú yfir um frumvarp til laga um breytingar á sveitarstjórnarlögum og lögum um ríkisendurskoðanda og endurskoðun ríkisreikninga, vegna mats á fjárhagslegum áhrifum frumvarpa, stjórnvaldsfyrirmæla eða annarra stefnumarkandi ákvarðana af hálfu ríkisins á sveitarfélög. Frestur til að skila inn umsögn er til og með 4. mars nk.
https://island.is/samradsgatt/mal/3923

Tekið fyrir erindi frá Húsnæðis- og mannvirkjastofnun, dagsett þann 20. febrúar 2025, þar sem fram kemur að fyrr í þessum mánuði stóð HMS fyrir opnum fundi undir yfirskriftinni: "Hver á Ísland? Eignarhald og afmörkun jarða." Á fundinum var ýtt úr vör verkefni sem felur í sér að áætla legu eignamarka og ná utan um eignarhald jarða á Íslandi. Undanfarin ár hefur verið mikil umræða um eignarhald lands á Íslandi en skráning fasteigna eins og henni hefur verið háttað fram til þessa í fasteignaskrá hefur ekki getað gefið skýr svör um stærðir eigna og afmörkun þeirra.
HMS vinnur að uppbyggingu landeignaskrár svo til verði heildstætt upplýsingakerfi um eignarhald lands á Íslandi.

Búið að áætla um 1.730 jarðir í landeignaskránni, allt frá Hrútafjarðará að Skjálfandafljóti. Þá hafa um 4.000 einstaklingar og lögaðilar hafa fengið bréf í gegnumisland.is um að eignamörk jarða hafi verið áætluð í landeignaskrá HMS. Við áætlun eignamarka er stuðst við opinber gögn, til dæmis landamerkjalýsingar, þinglýst skjöl, örnefni og loftmyndir.
Landeigendur eru hvattir til þess að kynna sér bréfið á island.is og hafa frest til 14. mars að gera athugasemdir.

https://landeignaskra.hms.is/

Bókað í trúnaðarmálabók.

Tekið fyrir álit frá Innviðaráðuneytinu, dagsett þann 24. febrúar sl, þar sem vísað er í kæru MAGNA lögmanna f.h. Viking Heliskiing ehf. dagsett þann 6. nóvember sl. þar sem kærð er ákvörðun sveitarstjórnar Dalvíkurbyggðar þann 18. júní sl. að veita Bergmönnum ehf. afnotarétt af landi sveitarfélagsins til þyrluskíðaferða.

Samandregið þá kemur fram í álitinu að ráðuneytið beinir þeim tilmælum til sveitarfélagsins að hafa ofangreind sjónarmið sem fram kom í álitinu til hliðsjónar við úthlutun takmarkaðra gæða við framtíðarráðstafanir þess. Ber sveitarfélaginu að gæta að grundvallarreglum stjórnsýsluréttar um jafnræði, réttmæti og meðalhóf þegar kemur að töku ákvarðana og við málsmeðferð mála, er snúa að úthlutun gæða sveitarfélaga eða mála sem snúa að veitingu sérstakra ívilnana án auglýsingar. Það felur m.a. í sér að ákvarðanataka í slíkum málum skal byggja á málefnalegum sjónarmiðum og að ekki
verði gengið lengra en nauðsyn krefur til að ná þeim markmiðum sem stefnt er að við úthlutun gæðanna. Að öðru leyti telst málinu lokið af hálfu ráðuneytisins.

Álitið er aðgengilegt í heild sinni á vef ráðuneytisins;

https://www.stjornarradid.is/gogn/urskurdir-og-alit-/stakur-urskurdur/?newsid=59bfa646-f362-11ef-b88e-005056bcde1f&cname=Álit á sviði sveitarstjórnarmála

Bókað í trúnaðarmálabók.

Sviðsstjóri fjármála- og stjórnsýslusviðs kynnti fundargerð starfs- og kjaranefndar frá 20. febrúar. sl.

Tekinn fyrir rafpóstur frá Sambandi íslenskra sveitarfélaga, dagsettur þann 12. febrúar sl, þar sem minnt er á Landsþing Sambands íslenskra sveitarfélaga þann 20. mars nk. á Hilton Reykjavík Nordica.Landsþingsfulltrúar sveitarfélaga sem og áheyrnafulltrúar eiga nú að hafa fengið formlegt boð ásamt drögum að dagskrá þingsins.