Byggðaráð

Vegagerðin leitar samstarfs við Dalvíkurbyggð um möguleg uppkaup á fasteigninni að Karlsrauðatorgi 6 til niðurrifs en það er í raun forsenda þess, að hægt verði að færa veglínuna og auka þar með vegsýn og umferðaröryggi. Sveitarstjórn samþykkti á fundi sínum þann 15. júní tillögu umhverfisráðs um að sveitarfélagið taki þátt í þessu samstarfsverkefni með Vegagerðinni og fól byggðaráði samtal við Vegagerðina um málið.

Helga Íris Ingólfsdóttir, skipulags- og tæknifulltrúi kom inn á fundinn kl. 14:14.

Til kynningar staða á vinnu við deiliskipulag á Hauganesi en umhverfisráð samþykkti á fundi sínum þann 21. júní samhljóða með fimm atkvæðum deiliskipulagið með lítils háttar breytingum og lagði til að deiliskipulagstillagan verði auglýst skv. 1. mgr. 41. gr. skipulagslaga nr. 123/2010.

Auglýstur hefur verið kynningar- og umræðufundur meðal íbúa vegna deiliskipulagsins og verður hann haldinn í Árskógi þriðjudaginn 6. júlí nk. kl. 17:00.

Rætt var um deiliskipulagið og minni háttar atriði sem koma þá til umræðu á kynningarfundinum, t.d. mikilvægi þess að gera ráð fyrir flóttaleið frá hafnarsvæðinu með ströndinni að gatnamótum við Nesveg.

Helga Íris vék af fundi kl. 14:54.

Sveitarstjóri greindi frá stöðu mála. Rætt um samstarfsmöguleika við nágrannasveitarfélögin eða að leysa málin með aðkeyptri þjónustu en núverandi byggingarfulltrúi mun hætta störfum hjá sveitarfélaginu um miðjan júlí.

Tekið fyrir erindi frá Eyþóri Björnssyni framkvæmdastjóra SSNE, dagsett 25. júní 2021 þar sem hann tilkynnir ráðningu verkefnisstjóra SSNE á Tröllaskaga.

Anna Lind Björnsdóttir hefur verið ráðin í starfið. Gert er ráð fyrir að hún hefji störf 9. ágúst nk. Hún er með meistaragráðu í náttúrutengdri ferðaþjónustu frá Norwegian University of Life Science og Bs gráðu í ferðamálafræði frá Háskólanum á Hólum.

Á fundi sínum þann 15. júní 2021 vísaði sveitarstjórn ákvarðanatöku um nýtt hlutverk fyrir Gamla skóla til fullnaðarafgreiðslu í byggðaráði.

Fyrir fundinum lágu upplýsingar um kostnað verkefnisins og útfærslur frá sveitarstjóra, forstöðumanni safna og þjónustu- og upplýsingafulltrúa.

Lögð fram til kynningar fundargerð stjórnar Dalbæjar frá 6. fundi ársins þann 6. maí 2021.

Lagðar fram til kynningar fimm fundargerðir stjórnar SSNE frá 23.-27. fundi, febrúar til júní 2021.

Í lok fundarins fór byggðaráð í vettvangsferð um húsnæði Dalvíkurskóla með deildarstjóra Eigna- og framkvæmdadeildar, sviðsstjóra Fræðslu- og menningarsviðs, skólastjóra og sveitarstjóra. Ferðin er farin eftir ábendingar kennara, til að taka út ásýnd húsnæðisins og ástand búnaðar og undirbúa þannig mat á þörf til búnaðarkaupa á fjárhagsáætlun næstu ára.