Byggðaráð

Jón Ingi Sveinsson vék af fundi kl. 13:00 vegna vanhæfis.

Börkur Þór Ottósson, sviðsstjóri umhverfis- og tæknisviðs og Steinþór Björnsson, deildarstjóri eigna- og framkvæmdadeildar, komu á fundinn kl. 13:00.

Til umræðu snjómokstur í vetur. Veturinn hefur verið mjög snjóþungur og miklir umhleypingar sem oft á tíðum kalla á daglegan snjómokstur bæði í þéttbýli og dreifbýli.

Með fundarboði fylgdi samantekt á kostnaði vegna snjómoksturs í Dalvíkurbyggð árin 2015-2020 þar sem fram kemur að í desember 2019 og janúar og febrúar 2020 er varið meiri fjármunum til snjómoksturs en í nokkrum öðrum mánuðum á þessu 5 ára tímabili.
Þannig er meðaltal kostnaðar vegna snjómoksturs árin 2015-2018 um 25 miljónir króna á ári. Árið 2019 varði Dalvíkurbyggð tæpum 40 miljónum króna í snjómokstur í heild, stærsti einstaki mánuðurinn var desember með 15 miljónir króna. Janúar 2020 kostaði 11,5 miljónir króna og áætlað er að febrúar hafi kostað um 14 miljónir króna í snjómokstri.
Í fjárhagsáætlun 2020 var gert ráð fyrir 25,8 miljónum í snjómokstur á deild 10600 og er það fjármagn að klárast um þessar mundir.

Aðeins er um að ræða að draga mjög verulega úr þjónustu eða samþykkja viðauka. Með fundarboðinu fylgdi beiðni um viðauka upp á 20 miljónir króna á deild 10600 lykil 4948, snjómokstur. Viðaukanum verði mætt með lækkun á handbæru fé.

Jón Ingi kom aftur inn á fundinn kl. 13:25.

Á 933. fundi byggðarráðs þann 30. janúar 2020 var sviðsstjóra umhverfis- og tæknisviðs ásamt deildarstjóra eigna- og framkvæmdadeildar falið að kanna kosti og galla þess að auglýsa Gamla skóla til leigu í því ástandi sem hann er.
Þeir skoðuðu húsnæðið með fagmanni, bæði með leigu í huga og eins möguleika á því að breyta húsnæðinu í íbúðir.
Þeirra mat er að húsnæðið sé óhæft til leigu í því ástandi sem það er í dag. Víða er leki í húsinu og yfirfara þarf allt ofnakerfi hússins.

Þann 10. apríl 2019 óskaði RARIK eftir viðræðum við Dalvíkurbyggð um yfirtöku á götulýsingarkerfi sveitarfélagsins. Samkvæmt erindinu urðu ákveðin kaflaskil þegar raforkulög nr. 65 frá árinu 2003 tóku gildi. Samkvæmt þeim þá fellur götulýsing ekki undir einkaleyfisstarfsemi dreifiveitufyrirtækja. Uppsetning og rekstur götuljósa kemur þannig ekki inn í tekjuheimildir dreifiveitu eins og starfsemi við rekstur dreifikerfa. RARIK hefur því þurft að halda götulýsingunni utan við hefðbundinn rekstur og utan við tekjuuppgjör gagnvart Orkustofnun.

Með fundarboði fylgdu drög að samningi á milli RARIK og Dalvíkurbyggðar um afhendingu RARIK á götulýsingarkerfinu til eignar í Dalvíkurbyggð. Í drögunum kemur fram að sveitarfélagið yfirtekur og eignast götulýsingarkerfið í því ástandi sem það er við undirritun samnings og er dagsetning yfirtöku 1. júní 2020.

Börkur og Steinþór viku af fundi kl. 13:47.

Tekið fyrir erindi frá sviðsstjóra fræðslu- og menningarsviðs, dagsett 25. febrúar 2020, þar sem hann óskar eftir viðauka við launáætlun á leikskólanum á Krílakoti vegna langtímaveikinda starfsmanns í þrjá mánuði. Ekki er gert ráð fyrir langtímaveikindum í launaáætlun fyrir fjárhagsárið 2020 og því ekki svigrúm inn í áætlun til að mæta þeim viðbótar kostnaði.

Óskað er eftir launaviðauka kr. 4.549.549 á deild 04140, Krílakot vegna ofangreinds, og að viðaukanum verði mætt með lækkun á handbæru fé.

Sveitarstjórn Dalvíkurbyggðar samþykkti samhljóða, á fundi sínum 29. nóvember 2019, að fela sveitarstjóra að leita eftir láni hjá Lánasjóði sveitarfélaga, fyrir Hafnasjóð Dalvíkurbyggðar skv. fjárhagsáætlun 2019, að upphæð 90 milljónir króna.
Í lok janúar 2020 komu upplýsingar frá Lánasjóðnum um að umsókn Dalvíkurbyggðar hefði verið samþykkt og fylgdi lánssamningur með fundarboði byggðaráðs.

Þar sem lántakan náðist ekki inn á árið 2019 þarf viðauka við fjárhagsáætlun 2020 upp á 90 miljónir króna til hækkunar langtímaskulda Hafnasjóðs Dalvíkurbyggðar, deild 42500. Fjárhæðin kemur til hækkunar á handbæru fé.

Þann 2. janúar 2020 sendi Dalvíkurbyggð Ríkinu formlegt tilboð í Selárlandið á Árskógsströnd.

Þann 2. mars 2020 barst svar frá Fjármála- og efnahagsráðuneytinu þar sem tilboði sveitarfélagsins er hafnað. Óskað er eftir öðru verðmati frá óháðum aðila á verðmæti Selárlandsins.

Með fundarboði fylgdu drög að endurskoðaðri lögreglusamþykkt Dalvíkurbyggðar.
Einu efnislegu breytingarnar sem lagðar eru til eru við 24. grein. Þar er lagt til að opnunartími á áfengisveitingastöðum í flokki III verði lengdur til kl. 01:00 virka daga. Þetta er lagt til eftir ábendingar frá rekstraraðilum í sveitarfélaginu og einnig eftir samanburð við lögreglusamþykktir nágrannasveitarfélaganna.

Lagðar fram til kynningar og umræðu fundargerðir starfs- og kjaranefndar frá 3. september 2019 til 3. mars 2020.

Einnig lagt fram til kynningar leiðbeiningarblað frá Sambandi íslenskra sveitarfélaga vegna verkfalla BSRB.

Þá fylgdi með fundarboðinu endurskoðað og uppfært erindisbréf nefndarinnar eftir breytingu á heiti hennar úr ráðninganefnd í starfs- og kjaranefnd í september 2019.

Lagðar fram til kynningar fundargerðir SSNE frá
5. fundi 12. febrúar 2020 og
6. fundi 21. febrúar 2020.

Lagðar fram til kynningar margvíslegar upplýsingar sem borist hafa vegna viðbragða og verklagsreglna vegna kóróna veirunnar.

Katrín Sigurjónsdóttir, sveitarstjóri, gerði grein fyrir upplýsingafundum sem hún hefur setið með Almannavarnanefnd vegna málsins. Einnig fór hún yfir viðbrögð stofnana sveitarfélagsins og upplýsingar hafa verið veittar til starfsfólks og viðskiptavina.

Tekinn fyrir rafpóstur frá nefndasviði Alþingis dagsettur 27. febrúar 2020 þar sem umhverfis- og samgöngunefnd Alþingis sendir til umsagnar tillögu til þingsályktunar um um þjóðaratkvæðagreiðslu um framtíð Reykjavíkurflugvallar, 311. mál.

Þess er óskað að undirrituð umsögn berist eigi síðar en 19. mars nk.

Bókað í trúnaðarmálabók