Byggðaráð

Á 934. fundi byggðaráðs þann 13. febrúar sl. fól byggðaráð sveitarstjóra að kanna með möguleika á lengri tíma afleysingu fyrir fjármála- og stjórnsýslusvið vegna veikinda.

Með fundarboði fylgdu drög að samningi við Projects ehf. um sérfræðiþjónustu í þessum veikindaforöllum ásamt beiðni um viðauka við fjárhagsáætlun 2020 vegna þessa.

Óskað er eftir viðauka að upphæð 7.500.000 kr við deild 21400, skrifstofa Dalvíkurbyggðar, á lið 4391, sérfræðiþjónusta. Óskað er eftir að viðaukanum verði mætt með lækkun á handbæru fé.

Með fundarboði fylgdi beiðni frá sveitarstjóra um viðauka vegna fargjalda í fjárhagsáætlun 2020. Samkvæmt upplýsingum frá aðalbókara keyrðist liðurinn fargjöld, í öllum deildum, ekki inn í áætlunarlíkan úr vinnubókum við gerð fjárhagsáætlunar 2020 vegna kerfisvillu, alls 3.159.000 kr.

Því er óskað eftir viðauka við fjárhagsáætlun 2020 vegna fargjalda, alls 3.159.000 kr. deilist á 22 málaflokka, gjaldaliður 4210, fargjöld.
Óskað er eftir að mæta þessari leiðréttingu með lækkun á handbæru fé.

Með fundarboði byggðaráðs fylgdi gildandi auglýsing um skrá yfir störf hjá Dalvíkurbyggð sem eru undanþegin verkfallsheimild, listi frá árinu 2019. Einnig fylgdi fundarboði listi með tillögum að breytingum vegna breytinga á starfsheitum hjá Dalvíkurbyggð sem og vegna aukinnar þjónustu í málefnum fatlaðra.

Á 931. fundi byggðaráðs þann 17. janúar 2020 heimilaði byggðaráð sviðsstjórum félagsmála- og fræðslusviðs sölu á gömlu bifreið sviðanna að undangenginni auglýsingu og að söluandvirðið komi inn í viðauka til hækkunar á handbæru fé þegar salan er um garð gengin.

Með fundarboði fylgdu upplýsingar um sölu bifreiðarinnar og fjárhagsfærslur henni tengdar í bókhaldi, frá aðalbókara.

Á 931. fundi byggðaráðs þann 17. janúar 2020 var til umfjöllunar viðaukabeiðni vegna viðhalds á dráttarvél umhverfis- og tæknisviðs. Í framhaldi af því sköpuðust umræður um nauðsyn þess að móta reglur vegna umgengni um tækjabúnað og bifreiðaeign sveitarfélagsins.

Með fundarboði fylgdu drög að verkefnislýsingu fyrir vinnuhóp um rekstur og viðhald farartækja, tækja og tæknibúnaðar sveitarfélagsins. Markmið vinnuhópsins er að lágmarka rekstrarkostnað og hámarka öryggi og endingu farartækja, tækja og tæknibúnaðar í eigu sveitarfélagsins til lengri tíma. Markmiðið náist með því að skipuleggja reglubundið og tímasett viðhald,endurnýjun sem og skýrt skilgreindum eftirlits- og ábyrgðaraðila.

Lagt er til að vinnuhópinn skipi 4 aðilar: Einn frá byggðaráði, einn frá veitusviði, einn frá hafnasviði og deildarstjóri eigna- og framkvæmdadeildar.

Vinnuhópurinn skili drögum að nýrri stefnu, skráningu og vinnulagi fyrir 30. apríl 2020.

Á 932. fundi byggðaráðs þann 23. janúar 2020 fól byggðaráð sveitarstjóra og sviðsstjóra umhverfis- og tæknisviðs að yfirfara húsnæðisáætlun 2019-2027 og leggja fyrir byggðaráð fyrir lok febrúar.

Sveitarstjóri kynnti stöðu á vinnu við endurskoðun áætlunarinnar en áætlað er að endurskoðuð áætlun verði til samþykktar sveitarstjórnar á marsfundi. Búið er að upplýsa Íbúðalánasjóð um stöðu á endurskoðun áætlunarinnar.

Tekið fyrir bréf frá Greið leið ehf., dagsett 17. febrúar 2020, boð á aukaaðalfund 2020 þann 25. febrúar 2020 á Akureyri.

Á 317. fundi sveitarstjórnar þann 31. október var eftirfarandi bókað:
"Sveitarstjórn samþykkir samhljóða með 7 atkvæðum að sveitarfélagið ásamt stjórnendum Dalbæjar fari í viðræður við Ríkið um aðkomu að endurbótunum þar sem málaflokkurinn er á hendi Ríkisins."

Jafnframt samþykkti sveitarstjórn á sama fundi fjárhagsáætlun 2020-2023 þar sem gert er ráð fyrir aðkomu sveitarfélagsins að endurbótum á Dalbæ fáist ekki aukið framlag frá Ríki.

Á fundinum upplýsti sveitarstjóri um gang mála frá síðastliðnu hausti. Niðurstaðan er sú að ef gera á við hús í eigu sjálfseignarstofnunnar eða húsnæði sem ekki er komið á forgang á framkvæmdaáætlun, er því miður ekki um annað að ræða en umsókn til Framkvæmdasjóðs aldraðra.

Tekið fyrir erindi frá Eftirlitsnefnd með fjármálum sveitarfélaga til sveitarstjórna, dagsett 10. febrúar 2020. Vísað er í bréf nefndarinnar frá 18. mars 2019 þar sem fjallað var um fjárfestingar og eftirlit með framvindu á árinu 2019.

Nefndin óskar eftir yfirliti um stöðu einstakra verkefna í árslok 2019. Jafnframt er óskað eftir mati á stöðu verkefna gagnvart gildandi fjárheimildum.

Óskað er eftir að umbeðnar upplýsingar berist eftirlitsnefndinni að lokinni umræðu í sveitarstjórn og eigi síðar en 60 dögum eftir dagsetningu bréfsins.

Tekinn fyrir rafpóstur frá fjórum félögum í Félagi Húsbílaeigenda, 4x4 og Boreal ehf., dagsettur 18. febrúar 2020.
Í erindinu er óskað eftir að þeir sem eiga tjaldvagna, fellihýsi, hjólhýsi, húsbíla og annan sambærilegan búnað sem er útbúinn salernisaðstöðu, t.a.m. ferðasalerni, þurfi ekki að leita leyfis landeigenda til að tjalda/nátta, heldur gildi almannarétturinn, enda skal ferðamaðurinn virða umgengisreglur í hvívetna og gæta að grónu landi.

Tekinn fyrir rafpóstur frá nefndasviði Alþingis dagsettur 25. febrúar 2020 þar sem velferðarnefnd Alþingis sendir til umsagnar tillögu til þingsályktunar um stöðu barna tíu árum eftir hrun, 191. mál.

Þess er óskað að undirrituð umsögn berist eigi síðar en 17. mars nk.

Tekinn fyrir rafpóstur frá nefndasviði Alþingis dagsettur 25. febrúar 2020 þar sem velferðarnefnd Alþingis sendir til umsagnar frumvarp, tillögu um breytingu á lögum um heilbrigðisþjónustu, nr. 40/2007, og lögum um málefni aldraðra, nr. 125/1999, með síðari breytingum (réttur til einbýlis á öldrunarstofnunum), 323. mál.

Þess er óskað að undirrituð umsögn berist eigi síðar en 10. mars nk.

Tekinn fyrir rafpóstur frá Samgöngu- og sveitarstjórnarráðuneytinu dagsettur 12. febrúar 2020 þar sem fram kemur að drög að frumvarpi til breytinga á sveitarstjórnarlögum og lögum um tekjustofna sveitarfélaga hafa verið birt í samráðsgátt stjórnvalda til umsagnar.

Frestur til að skila umsögn er til og með fimmtudagsins 27. febrúar nk.

Nú er í samráðsgátt stjórnvalda frumvarp til laga um eignarhald og nýtingu fasteigna, mál S-34/2020.

Markmið frumvarpsins er að skapa stjórnvöldum betri yfirsýn og möguleika til að stýra þróun eignarráða og nýtingar fasteigna, þ.m.t. jarða, í samræmi við landkosti og með hagsmuni samfélagsins og komandi kynslóða að leiðarljósi.

Hægt er að senda inn umsagnir um frumvarpið til 27. febrúar nk.