Byggðaráð

Undir þessum lið mættu á fundinn kl. 13:00 Gísli Bjarnason, sviðsstjóri fræðslu- og menningarsviðs og Gísli Rúnar Gylfason, íþrótta- og æskulýðsfulltrúi.

Til kynningar drög að samningum við íþróttafélög í Dalvíkurbyggð til næstu fjögurra ára en íþrótta- og æskulýðsfulltrúi er búinn að kynna samningsdrögin fyrir félögunum. Stefnt er að því að skrifa undir samningana á hátíðarfundi íþrótta- og æskulýðsráðs þriðjudaginn 14. janúar 2020.
Farið yfir samningana og málin rædd.

Gísli og Gísli Rúnar viku af fundi kl. 13:41.

Sveitarstjóri kynnti drög að upplýsingaskýrslu sem hann er að taka saman um óveðrið í desember en Eyþing hefur borist beiðni um að taka saman upplýsingar frá sveitarfélögunum fyrir átakshóp fimm ráðuneyta sem stofnaður var í kjölfar óveðursins um miðjan desember.

Frestur til að skila upplýsingum er til 15. janúar nk.

Þann 6. janúar sl. var haldinn rýnifundur viðbragðsaðila í Dalvíkurbyggð eftir óveðrið í desember. Samþykkt var á þeim fundi að óska eftir tilnefningum frá viðbragðsaðilum um aðalmann og varamann í Vettvangsstjórn viðbragðsaðila í Dalvíkurbyggð. Miðað sé við að hópurinn fundi árlega að lágmarki og fari yfir verklag og vinnuferla ef vá ber að höndum.

Fyrirhugaður er íbúafundur á Rimum um óveðrið, þegar veður leyfir.

Tekið fyrir erindi frá vinabænum Lundi í Svíþjóð dagsett 7. nóvember 2019 þar sem viðruð er hugmynd um að nota milliáramót sumarið 2020 sem tækifæri til að ræða sameiginlega stefnu norræna vinabæjasamstarfsins og þróa ný drög. Núverandi stefna, "En lärande nordisk community - Ett lärende nordisk felleskab" er frá 14.01.2009. Ný stefna gæti síðan verið undirrituð á reglulegu vinabæjarmóti sem á, samkvæmt áætlun, að halda sumarið 2021 í Dalvíkurbyggð.

Rætt um vinabæjarsamstarfið og framtíðarhorfur þess.

Tekið fyrir erindi frá sýslumanninum á Norðurlandi eystra dagsett 2. janúar 2020, umsagnarbeiðni vegna umsóknar um rekstrarleyfi veitinga í flokki III frá Gregdalvik ehf. kt. 691111-0910.

Fyrir liggur umsögn frá byggingarfulltrúa og slökkviliðsstjóra sem gera ekki athugasemdir við að umrætt leyfi sé endurnýjað.

Tekið fyrir erindi frá Eyjafjarðardeild Rauða krossins dagsett 19. desember 2019, þar sem óskað er eftir styrk að upphæð 2.000.000 króna til að efla neyðarvarnir í Dalvíkurbyggð.

Styrkurinn er ætlaður til búnaðarkaupa fyrir neyðarvarnakerru, þannig að á Dalvík verði fullnægjandi búnaður til að opna fjöldahjálparstöð. Búnaðarlisti kerrunnar fylgdi með erindinu.

Rauði krossinn heldur námskeið í Dalvíkurskóla þann 13. janúar nk. fyrir nýja sjálfboðaliða í neyðarvörnum, með það að leiðarljósi að efla neyðarvarnir á svæðinu. Rauði krossinn leggur út fyrir þeim kostnaði sem til fellur vegna öflunar og þjálfunar sjálfboðaliða á svæðinu en óskar eftir styrk vegna kaupa á kerrunni.

Tekið fyrir erindi frá Eyþingi, AFE og AÞ dagsett 30. desember 2019, tilkynning um stofnun nýrra landshlutasamtaka, Samtök atvinnuþróunar og sveitarfélaga á Norðurlandi eystra.

Frá og með 1. janúar 2020 yfirtaka nýju samtökin réttindi og skyldur atvinnuþróunarfélaganna og þar með talið framlög sveitarfélaganna til Eyþings, AFE og AÞ.

Á fundinum kom fram að nú stendur yfir samkeppni um nafn á hin nýju samtök og einnig ráðning framkvæmdastjóra til hinna nýju samtaka.

Sveitarstjóri gerði grein fyrir fundi samstarfsnefndar lögreglu og sveitarfélaga á Norðurlandi eystra þann 28. nóvember s.l. og þeim kynningum sem farið var yfir á fundinum.

Þar var m.a. til umfjöllunar staða lögreglunnar í embættinu, verkefni og tækjabúnaður rannsóknardeildar, löggæslumyndavélar og kynning á Bjarmahlíð, miðstöð þolenda ofbeldis.

Tekinn fyrir rafpóstur frá Samgöngu- og sveitarstjórnarráðuneytinu dagsettur 10. desember 2019 þar sem fram kemur að drög að frumvarpi til nýrra fjarskiptalaga eru nú í Samráðsgátt stjórnvalda.

Óskað er eftir umsögnum um drögin eigi síðar en 6. janúar 2020.

Lögð fram til kynningar fundargerð 877. fundar stjórnar Sambands íslenskra sveitarfélaga frá 13. desember 2019.