Veitu- og hafnaráð

Fundargerð 434. fundar stjórnar Hafnasambands Íslands.
Föstudaginn 30. apríl 2021, kl. 10:30, kom stjórn Hafnasambands Íslands saman til fundar og fór hann fram í gegnum fjarfundarbúnað.

Vakin er athygli á 2. dagskrárlið, sem var um fyrirhugaðan hafnafund sem er á dagskrá 20. maí 2021. Stjórnin samþykkti að fresta honum til 3. september svo að hægt yrði að halda staðfund.

Samtök sjávarútvegssveitarfélaga sendu, með rafbréfi 6. maí 2021, öllum aðildarsveitarfélögum, ársreikning og fundargerðir nr. 63 og 64. til kynningar.

Samgöngu- og sveitarstjórnarráðuneyti hefur staðfest Reglugerð fyrir Hafnasjóð Dalvíkurbyggðar og var hún birt með auglýsingu í stjórnartíðindum þann 5. mars 2021.

Á fundinum var kynnt viðbragðsáætlun Hafnasjóðs Dalvíkurbyggðar og með bréfi Umhverfisstofnun, sem dagsett er 16. apríl 2021, er hún samþykkt af stofnuninni.

Þann 19. apríl var haldinn opinn fundur með notendum Árskógssandshafnar þar sem kynnt voru áform um landfyllingu og lagfæringu á innsiglingunni að höfninni. Umræður voru málefnalegar og fjölluðu töluvert um ókyrrð í höfninni og þörf fyrir fleiri bílastæði vegna farþega sem nýta sér ferjusiglingar til Hríseyjar.

Fyrir fundinum er einnig bréf, frá 5. maí sl. frá Andey ehf., en það fyrirtæki er rekstraraðili ferjunnar til Hríseyjar. Í því eru reifaðar ýmsar hugmyndir sem snúa að aðstöðu innan hafnar og ytri mannvirkjum hafnarinnar og einnig fyrirhuguðum landfyllingaráformum.

Með bréfi dagsettu 2. mars 2021 vilja Jafnréttisstofa og Samband íslenskra sveitarfélaga vekja athygli sveitarfélaga á þeim breytingum sem tóku gildi með tvennum nýjum lögum á sviði jafnréttismála sem tóku gildi í desember 2020, en þar er aukin krafa gerð til jafnréttisáætlana sveitarfélaga og að stefnt skuli að því að sveitarfélög verði samfélög án aðgreiningar.

Á fundinum kynnti sviðsstjóri grófa samantekt á fjölda þeirra íbúðar- og sumarhúsa sem ekki hafa rotþrær í Dalvíkurbyggð. Einnig kom fram í máli hans að núna getur hver sem er séð á heimasíðu Dalvíkurbyggðar staðsetningu lagna veitna Dalvíkurbyggðar og þar með rotþróa.

Sviðsstjóri gerði verðkönnun vegna hreinsunar holræsa og tæmingu rotþróa í Dalvíkurbyggð. Tveimur verktökum var gefinn kostur á að bjóða í verkefnið en þeir voru Hreinsitækni hf. og Verkval hf. Upplýsingar um niðurstöðu verðkönnunarinnar er undir málinu og þar kemur fram að hagkvæmara sé að gera samning við Hreinsitækni um verkefnið.