Frá stjórn Menntaskólans á Tröllaskaga; Ályktun skólanefndar Menntaskólans á Tröllaskaga; áhyggjur af framtíð skólans.

Málsnúmer 201411098

Vakta málsnúmer

Byggðaráð - 719. fundur - 27.11.2014

Undir þessum lið komu á fund byggðarráðs Hildur Ösp Gylfadóttir, formaður skólanefndar Menntaskólans á Tröllaskaga, og Lára Stefánsdóttir, skólameistari, kl. 8:15.

Með fundarboði byggðarráðs fylgdi eftirfarandi ályktun skólanefndar frá 18. nóvember 2014:
Skólanefnd Menntaskólans á Tröllaskaga lýsir efasemdum um hugmyndir menntamálaráðherra um sameiningu framhaldsskóla landsins. Áherslan á sameiningu virðist án tillits til fjárhags og stöðu þeirra skóla sem um ræðir, án tillits til fjölda nemenda, stefnu eða sérstöðu skólanna né mats á þeim árangri sem þeir eru að ná. Er ljóst að mati skólanefndar að sameining MTR við aðra skóla mun koma niður á starfi skólans og takmarka getu hans til að koma til móts við þarfir nemenda sinna og samfélags. Óljóst er með öllu hvaða sparnaður næst, hvaða faglegi ávinningur næst né hvaða tækifæri liggja í þessum breytingum fyrir nýjan skóla sem sannað hefur gildi sitt og verið til fyrirmyndar í innleiðingu nýjustu viðmiða í starfi framhaldsskóla.

Skólanefnd lítur svo á að vænlegasta leiðin til eflingar skólastarfs á landbyggðinni sé gegnum klasasamstarf framhaldsskóla. T.d. undir merkjum Fjarmenntaskólans um eflingu náms í dreifðum byggðum og samstarfi um kennslu nemenda skólanna til að tryggja trausta þekkingu fagmanna á þeim námsgreinum sem kenndar eru og auka hagkvæmni í rekstri skólanna.

Á fundinum lagði skólameistari MT fram yfirlit um rekstur og starfsemi skólans, dagsett þann 27.11.2014.

Til umræðu ofangreint.

Hildur Ösp og Lára viku af fundi kl. 09:04.
Byggðarráð samþykkir samhljóða með 3 atkvæðum eftirfarandi:
Byggðarráð Dalvíkurbyggðar mótmælir harðlega þeim áformum stjórnvalda að skerða möguleika fólks á svæðinu til náms enda er það samfélagslegur ávinningur íbúanna á svæðinu að hér sé áframhaldandi uppbygging á námstækifærum sem ýta undir það að ungt fólk sjái tækifæri að setjast að í sinni heimabyggð sem og að laða að nýja íbúa. Byggðarráð telur mikilvægt að halda áfram jákvæðri uppbyggingu á svæðinu sem er í takt við áform stjórnvalda um eflingu byggða á landinu.

Byggðarráð tekur heilshugar undir ofangreinda ályktun skólanefndar og styður við bókun bæjarráðs Fjallabyggðar sem er eftirfarandi, sbr. fundur 18. nóvember s.l.:

"Bæjarráð Fjallabyggðar mótmælir harðlega þeim áformum stjórnvalda að skerða möguleika til framhaldsnáms í sveitarfélaginu. Áform þessi virðast hvorki tilgreina hvaða sparnaður eða faglegi ávinningur næst né hvaða tækifæri liggja í þessum breytingum fyrir nýjan skóla sem sannað hefur gildi sitt og hefur ávallt verið rekinn innan fjárlaga.

Menntaskólinn á Tröllaskaga er ein af grundvallarstofnunum samfélagsins sem hefur veitt fólki möguleika á að stunda framhaldsskólanám í sinni heimabyggð.

Fólk eldra en 25 ára hefur í miklum mæli stundað nám við skólann en með boðuðum breytingum mun slíkt ekki standa fólki til boða. Með þeim er vegið að starfsemi og sjálfstæði skólans og því skorar bæjarráð á þingmenn kjördæmisins að koma í veg fyrir að þessi áform verði að veruleika."